الأستاذ مولاي أحمد بلبهلول .
الحلقة الثانية :
سعادة الرايس توقفنا معاك فالحوار السابق عند موضوع ” الغدا بعد كل دورة ، كايجيو يتغداو عندك فدارك و كاتتهلا فيهم آش منك يا شوى آش منك يا دجاج بلدي آش منك يا كسكسو آش منك يا ديسير ، واش الأعضاء كاتدير ليهم عالغدا صافي ، ما كاتعطيهم والو ؟
- كيفاش ما نعطيهم والو علاه هاذ الشي ساهل ؟ لا ما يمكنش تاهما راهم خسرو لفلوس باش نجحو ، راهم كايشريو لصوات و كايطيبو لغداوات و لعشوات راه شهر و الناس كاتاكل و تشرب كاين اللي خاسر 30 مليون كاين اللي خاسر 40 مليون و كاين اللي كايفوت 100 مليون إلى كان ناوي يتريس ، كل واحد و جهدو ، على حساب آش ناوي هو ، واش باغي رايس و لا باغي نايب و لا عضو ، و بغيتوهم يصوتو فابور ؟
سعادة الرايس واش هادو كلهم كاترجع ليهم فلوسهم ؟
- معلوم نرجع ليهم فلوسهم كايجيبو ليا المصاريف و كانبدا نرد ليهم بالشوية بالشوية ، اليوم بيني و بينكم راه الوقت تصوبات ما بقاتش كيف كانت .
كيفاش أسعادة الرايس ؟
- مللي ماكانتش “اللايحة” كنا كانشريو الأعضاء كل واحد وحدو و كانت القضية كاتطلع علينا غالية ، و دابا عدنا كانشريو عا وكيل “اللايحة” حيت هادوك اللي معاه عامجرورين كاين فيهم اللي ما يجيب تاصوت و لكن لاصق ورا مول ” اللايحة” هو اللي كاينجحو ، و كاين منهم اللي مرشح فلائحة و مصوت على لائحة أخرى ، هاذ الانتخابات بحال إلى كاتلعب “ضامة” بالبخوش تحطها هنا و تلقاها مشات عند لاخور ، راهم بلاوات .
سعادة الرايس نرجعو للسؤال كيفاش كاترد ليهم فلوسهم و هي فلوس كثيرة ؟
- لا ما كثيرة والو داكشي ساهل ، مالي كانعطيهم من جيبي .
و كيف كاتدير ؟
- دابا أسيدي الميزانية فيها شلا بيبان وشلا سراجم خرج ودخل منين بغيتي ماكاينش اللي يسول فيك خاصك عا توصل تعود رايس .
سؤال : عطينا شي مثل أسعادة الرايس ؟
- نعطيكم المثل و لكن هاذ الشي يبقى بيناتنا ما يعرفوهش الناس ،
كن هاني أسعادة الرايس الى خرجناه راه منجبدوش سميتك .
- أودي لا راهم كايطيرو رايعرفوني .
لا أسعادة الرايس ما غاديش يعرفوك .
- أسيدي يعرفو و لا لايعرفو أنا قضيت الغرض و ما باقيش باغي نترشح ، كنت ساكن فدار ديال 100 ميترو دابا درت 3 فيلات و 2 فيرمات ، 4 مشاريع تنموية ،
واش هاذ المشاريع التنموية درتيها للجماعة ؟
- لا آش بيني و بين شي جماعة درتها لراسي راني كاندير علاش نرجع أنا و ولادي و نسابي راه مللي ترشحت ما كانت عندي تا طوموبيل دابا راهم عا شايطين الدار عامرا ما بقينا لقينا فين نوقفوهم ،
بصحتك و راحتك أسعادة الرايس تستاهل أكثر ، نرجعو”لسؤالنا راك باقي ما جاوتيناش عليه .
- إينا سؤال ؟
كيفاش كاترد لفلوس للأعضاء ؟
- داك الشي ساهل ،
بحالاش ساهل أسعادة الرايس ؟ وضح باش القارئ يفهم ،
- واش هاذ الشي بغيتو تنشروه ؟
ما تخافش أسعادة الرايس ما غادي نشيرو لا لسميتك و لا لإسم ( جماعتك ) ، وياك قلتي لينا نتا ما باقيش باغي تترشح ؟
- قلتها و لكن ماتعرف الوقت آش تجيب ،
نتمناو ليك التوفيق ،
- علاش سولتوني ؟
سولناك كيفاش كاترد لفلوس ؟
- كاندير صفقة ديال الستيلوات و لكاغيط و لمداد و شي آلات ب : 20 مليون ، و كاندير صفقة ديال الشجر زعما شرينا الشجر , و هادي نقدرو نديرو ليها تا 100 مليون و لا كثر و صفقة إصلاح بنايات إدارية ، و صفقة إصلاح شي حاجة و شي حاجة ماكاينة و نديرو صفقة ديال الكراسة و الطبالي ، و النفورات و تزليج الساحات العمومية و أمام المساجد بزاف مايدار …..
و لكن اسعادة الرايس راك باقي ما جاوبتيناش على السؤال ديالنا .
- لا راني جاوبتكم عا مافهمتونيش ، دابا هاذ الصفقات كلهم كايكونو عا فلوراق العام الأول كاتخلص الأعضاء و من بعد كاتبقى عا تروف عليهم .
سؤال : كيفاش تروف عليهم ما فهمناهاش تروف عليهم ؟
- هي نحلق عليهم .
وضح أسعادة الرايس هاذ المصطلحات ما فهمناهاش ؟
- علاه نتوما ماشي منهنا ؟
لا أسعادة الرايس كون كنا من هنا ما غاديش نقدرو نجيو عندك نسولوك هاذ الأسئلة .
- هكاك نروف و نحلق و ندور هي كا نبقى مرة مرة نعطيهم شي براكة ….
شكرا سعادة الرايس على هذه التوضيحات و إلى اللقاء في الحلقة القادمة .
- لا شكر على واجب .