الأستاذ مولاي أحمد بلبهلول .
الحلقة السادسة * :
سعادة ( الرايس ) نرحب بك مرة أخرى و نشكرك جزيل الشكر على تلبية الدعوة .
- مرحبا أنا رهن إشارتكم عاهو الى جات على خاطركم نوقفو عند هاذ الحلقة تايفوت رمضان .
ماكاين تامشكيل أسعادة الرايس .
- دابا خيطت 3 جلالب بزيويات كل وحدة فلون و خاصني نبدا نصلي واخا عالتراوح بعدا ، راه حشومة تكون رايس و ماعمر الناس شافوك فالجامع عا إلى مشينا مع العامل فشي مناسبة دينية ، منها يشوفوك الناس و منها مناسبة باش نلبس جلالبي راني شريتهم غالين .
واخا أسعادة الرايس ندخلو فالموضوع . وقفنا فالحلقة السابقة عند الواد الحار كاتقول بللي اللجنة ما عندها ما تعرف و ما عمرها تحصلنا ، شرح لينا كيفاش ؟
- دابا مللي شي واحد كايبغي يدير تجزئة التجزئة كلها قوادس كايدير لبلان كاتوافق عليه اللجنة المختصة مهمتها كاتنتهي فالموافقة ماكا تبقاش متبعة المراقبة حنا كانميكو ، القادوس ديال ميترو و نص كايدير فيه عا ميترو و ديال مترو كايدير فيه نص ميترو و ديال نص ميترو كايدير فيه 30 سنتيم مثلا و كاينة واحد الرملة رقيقة كايفرشوها لقوادس و كا يغطيوهم بها باش تحفظهم ما تهرسوش و هاذ الرملة غالية ما كا يديرهاش و لغرق اللي فلبلان كاتكون فيه 3 ميترو كا نسمحو ليه فميترو كا يحفر عا 2 ، هو كياكل خبيز و حنا كا ناكلو معاه خبيز .
سؤال : و لجان التفتيش ؟
جواب : اللجن كايلقاو كلشي تردم ما عندهم ما يعرفو و هاذ الشي ديال اللجان حنا راه بغينا نحيدوه ما يبقاش شي واحد يجي يبرزطنا .
و كيف غادي تديرو تا تحيدوه ؟
- جواب : علاه ما فخباركمش راحنا درنا جمعية ديال الرؤساء .
سؤال : و ما علاقة الجمعية بلجان التفتيش ؟
- جواب : الجمعية درناها باش تحمينا و تدافع لينا على مصالحنا .
سؤال : نتوما نتاخبوكم الناس باش تدافعو ليهم على مصالحهم صبحتو كاتقلبو على اللي يدافع عليكم هذا كايبين على أنكم غير مؤهلين لتسيير الشأن المحلي و الدفاع عن مصلحة المواطنين .
- حنا بغينا نبدلو القوانين ….
سؤال : عطينا مثال ؟
- جواب : أولا هذاك حرف ( ج ) فالطوموبيلات ديال الرياس ما بقيناش قابلينو بغينا نحيدوه بغينا تاحنا يديرو لينا المغرب الحمرا ( M روج ) بحال الباشوات و القياد باش البوليس و الجدارمية يعطيونا السلام و ما يوقفوناش فالطريق .
سؤال : و لكن أسعادة ( الرايس ) واخا يوقفوك الطوموبيل عندها وراقها التأمين على حساب الجماعة نتا ما خاسر والو ، الى وقفوك عطيهم لوراق .
- بغيتو تعرفو ؟
نعم بغينا نعرفو ….
- واحد النهار أسيدي أنا بصيفتي “رايس ” وصلت عند الجدارمية أنا و قفوني و مول لابيلانص سرحو ليه الطريق دابا بحال الى عاد الشيفور ديال لابيلانص حسن مني و راكبة معايا مرتي و ختها و نسيبتي ….
شوف أسعادة الرايس لابيلانص راه غاديا بمريض و ما خصوش يتعطل .
- واخا وهذاك لمريض حسن مني ؟
سعادة ” الرايس ” ماغاديش نتفاهمو معاك فهاذ النقطة من الأحسن نفوتوها ندوزو لنقطة أخرى آشنهيا المصالح الأخرى اللي بغات تدافع عليها الجمعية ؟ ؟
- جواب : ما باقيش تجي عندنا شي لجنة ديال التفتيش ويلى جات نجريو عليها ما نخليوهاش تدخل للجماعة و ما بقيش تجينا شي استدعاء من عند البوليس و لا من عند الجدارمية كايظلو يخلعو فينا ….
و لكن أسعادة ( الرايس ) هاذ لكلام اللي كا تقول راه في منتهى الخطورة ، الدولة راها عندها مؤسسات رقابية دوستورية مهمتها افتحاص مالية جميع المؤسسات بما فيها الجماعات ، “إذا ” نتوما و على حساب كلامك بغيتو تصبحو مستقلين عن الدولة وزارة الداخلية تاهيا خاصها تهز يدها ما باقيش تتدخل فيكم ؟
- شوف أسيدي حنا عارفين آش كانديرو وزير الداخلية الى جمعنا ليه 200 و لا 300 و نقدرو نجمعو تا 500 رايس واعتصمنا ليه قدام الوزارة باقي غادي يقدر يهضر معانا ؟
سعادة ( الرايس ) هذا راه كلام خطير و كلام كبير بزاف و ابتزاز ، كايضهر بغيتو تبداو تلعبو بالنار ؟
سعادة الرايس جاه تيلفون :
- ألو الزاهية كي ديرة لباس ؟
الحمد لله . و نتا ( الرايس ) كي داير ؟
- عاشوية و صافي …..
يا كما مريض ؟
- لا ما مريض و الو أنا نيت كنت ناوي نعيط ليك ….
خير ان شاء الله ..
- سمعي الزاهية عفاك مللي تكوني جايا للدورة نقصي شوية من لعكر و لكحل و لبسي شي لباس يكون يوالم …
شوف ( اسعادة ) الرايس هذيك حياتي و أنا حرة فيها تا واحد ما عندو الحق يلاحظ عليا ، بغيتيني نجي مكوشرة ؟ ما يمكنش راها كا تكون الصحافة و كاينشرو التصاور ديالنا فالفيسبوك ، و أنا نبغي نفقص العديان ….
- و الزاهية سمعي سمعي راه واحد النهار مرتي شافت التصاور فالفيسبوك سولتني قالت لي شكون هاذي اللي طالية وجها هاذ الطلية قلت ليها عضوة معانا قالت فاش خدامة قلت ليها : أستاذة قالت ليا محال هاذي تكون أستاذة سولتني واش مزوجة قلت ليها مزوجة و راجلها طبيب قالت لا لا ما ظاهر عليها لا زواج لا طبيب لا أستاذة رسلت تصاورك لشي صحاباتها سولتهم قالو ليها الزاهية ما خدامة ما مزوجة ، رجعت للدار شعلت معايا دوي الكذاب المنافق هاذي فعايلك هذيك اسمها الزاهية ما مزوجة ما أستاذة واش هذاك وجهك و لا قفاك كيفاش سولتك قلتي لي أستاذة زعما نت ما عرفهاش ؟ قلت ليها أنا عا كا نسمع الأعضاء كا يقولو ليها تفضلي الأستاذة يحساب لي نيت استاذة ، شهر ما بقات دوات معايا و مللي دوات عادت كا تعيط ليا : الكذاب مؤخرا جاتني واحد الضريبة ساهلة شيديت فيها طرف جيد ديال لفلوس و شريت ليها برطمة فسميتها فأكادير عاد سكتت عليا …..
إوا أسيدي تا أنا راني معيطة ليك على حساب برطمة راني مشيت للجديدة و لقيت شي برطمات عشاقة ب : 36 مليون التسبيق 16 و ربع ملايين فلعام غادي تعطيني التسبيق أسعادة الرايس و كل عام تعطيني ربع ملايين ويلى كانو الناس كيصوتو بيد وحدة أنا نصوت ليك بزوج يدين …
- واخا الزاهية ما يكون عا خاطرك تستاهلي كل خير ….
* ملحوظة هذه الحوارات لا تعني رئيسا معينا و لا جماعة معينة بقدر ما تسلط الضوء على بعض الخروقات و الاختلالات في بعض الجماعات الفاسدة التي لا تحترم المساطر القانونية .
بقلم الأستاذ مولاي أحمد بلبهلول .
مقالات ذات صلة
-
-
-
-
-
-
