الأستاذ مولاي أحمد بلبهلول .
الحلقة الرابعة * :
حوار مع ” سعادة الرايس” الحلقة الرابعة
سعادة الرايس مرحبا توقفنا في الحلقة الماضية عند ” لامين ” ديالكم مللي تكلم مع لوزير و قال ليه يتاصل بالوزير الفولاني و يخبرو بللي الرايس و الأعضاء بغاو يقدمو استقالتهم من الجماعة والحزب .
- جواب : هاذ المرة شفتكم زربتو أنا قلت ماغادي تسولو فيا تا للصيمانة الجاية .
عندك الحق أسعادة الرايس و لكن القراء عجبهم الحوار معاك و عجبتهم الصراحة ديالك و اتصلو بينا و طلبو منا باش نسرعو بالحلقة الرابعة لأنك شوقتيهم و بغاو يعرفو النتيجة ديال اللقاء ديالكم مع ” لامين ” و بغاوك تفيدهم بشي إضافة أخرى إلى كان ممكن .
- جواب : أسيدي مرحبا حنا رهن الإشارة .
سؤال : مللي اتصل ” لامين ” بالوزير آش قال ليه ؟
- شلا ماقال ، قال ليه هاذ الشي راه كا يمس بسمعة لبلاد و كايمس بالأمن و الاستقرار ، ديال الوطن ،و قال لينا حنا سيرو فحالكم من دابا اسبوع غادي توصلكم لخبار ، داز اسبوع عيط لينا .
سؤال : رجعتو عندو ؟
- جواب : لا عيط لينا فالتيلفون .
سؤال : لمن عيط بالضبط ؟
- جواب : عيط للمنسق ديال الحزب .
سؤال : آش قال ليه ؟
- جواب : قال ليه قول لسعادة الرايس و لعضا دياولو من هنا لشهر هذاك المسؤول غادي يمشي فحالو .
سؤال : فين فحالو ؟
- جواب : باللتي هاني جايك ، تاحنا فللول ما فهمناش آشني يمشي فحالو يحساب لينا بغاو يجريو عليه من الخدمة ، ساعاك عا حولوه لواحد لمدينة ، حنا مللي جاتنا لخبار ديال يمشي فحالو شوينا 7 لخرفان سنان لحليب و لبصطية ديال الحوت و الديسير جبناه من الدار البيضاء و عرضنا على الجماعة و العائلات ديال الأعضاء و درنا الحفلة و لفراجة .
سؤال : و علاش جبتو الديسير من الدار البيضاء ؟ و الديسير كاين عاهنا ؟
- جواب : حيت فيها الديسير بلا وقت : لعنب بلا وقت و البطيخ و برقاقة الصغيرة ما كايناش هنا .
سؤال : آشنية برقاقة الصغيرة ؟
- جواب : ديك الصغيرة اللي كايكونو فيها 5 و لا 6 فلعويد .
سؤال : آه باغي تقول : حب لملوك ؟
- جواب : هذاك هذاك .
سؤال : كا تاكلو و تشربو و من بعد ؟
- جواب : من بعد أسيدي كا نعلمو لعضا و الجماعة كا نقولو ليهم راه هذا المسؤول اللي عندنا راحنا شكينا بيه ” للامين ” و لامين راه دار خدمتو و من هنا شهر غادي يمشي فحالو .
سؤال : و مللي كمل شهر مشا ؟
- جواب : لا مامشاش تا داز عام .
سؤال : و نتوما علاش درتو الزردة و الحفلة و علمتو الناس ؟
- جواب : هاذيك أسيدي هيا السياسة .
سؤال : كيفاش السياسة ؟
- جواب : دابا مللي علمنا لامين خاصنا حنا نعلمو الناس باش يعرفونا بللي حنا اللي حولناه ، الناس مللي كا يسمعو هاذ لكلام و هو كا يتحول واخا تعطل شوية فالتحوال ، كا يبداو يخافو منا و المسؤول اللي كايجي فبلاصتو كاتوصلو لخبار و كايدير بحسابنا تاهو كايعود خايف ، و حنا كانبداو نخدمو بخاطرنا .
سؤال : سعادة ” الرايس ” نرجعو معاك للزردة اللي ذبحتو فيها 7 لخرفان ، واش من مالكم الخاص؟ و لا شراوهم الجماعة ؟ و لا تشاركتو فيهم ؟
- جواب : ما من مالنا الخاص ما من مال الجماعة ، ما تشركنا فيهم .
سؤال : و على حساب من ؟
- جواب : بحال هاذ الزردات كا نحسبوهم على المهرجان مثلا درنا حفلة بزوج ملاين و لا ثلاثة كا نديرو فلوراق 15 مليون كانخلصو هذاك لغدا و كاتشيط لينا 12 و لا 13 مليون ، كانتصرفو فيها و هاذ الشي ماشي عا حنا اللي كانديروه راه جاري به العمل عند بزاف ديال الرياس .
سؤال : و المعارضة ؟
- جواب : إينا معارضة ؟
سؤال : المعارضة اللي فلمجلس .
- جواب : لا ماكاين تامعارضة تاهما راهم كايحضرو معانا فين ما كانت شي وليمة و حنا ما كانساوهمش مرة مرة نروفو عليهم .
سؤال : ويلى جات شي لجنة ديال التفتيش آش كاتقولو ليها ؟
- جواب : وايلي الله يهديك اللجنة ماحصلتنا فالزفت ، ماحصلتنا فالمازوط ، ماحصلتنا فلكراسى والطبالي ، ماحصلتنا فالضو ، ماحصلتنا فالشانطيات ؛ ماحصلتنا فلقوادس ديال الواد الحار ، ماحصلتنا فلبياس ديال الكاميوات و الطوموبيلات ، و بغات تحصلنا فالماكلة ؟
سعادة ” الرايس ” نكتفي بهذا القدر شكرا جزيلا لك وإلى الحلقة القادمة .
- الرايس : لا شكر على واجب .