زجل : الدار الخالية .

الأستاذ رشيد ازطوطي

لرسام اهجرها لحمام
والدار الغالية
مولات النخلة العالية
ما ابق فيها دخان
كان اللي كان
مول لعصابة
البلغة والجلابة
قيمة اوشان
أو كانت اللي كانت
القفطان والشمار والسوارت
زينة الضحكة
أو زادها لوشام
البير والجابية
والزريبة ارسمها فنان
تلات العدة في يد الهراب
الدم ولا ما
والدهب سوم التراب
ملي نتفكر مسقط راسي
نتهوس يطير انعاسي
نضرب اخماسي في السداسي
نشوف الناس
كيف عيون الكسكاس
مضرورة وتݣول لباس
الكرامة هي الأساس
كيف نتفكر أيامكم
في امنامي نركب احلامي
ونجيكم
نضحك ونبكي في نفس الوقت
هادي مشاعركم
هادي الحياة
أكبر محكمة فيها حكمات
جوج لكمات
والثالثة جات بين لوقات
ابكي يا عيني
بشفارك جفي ادموعك
تركل يا ݣلبي
حابسينك اضلوعك
نعمة لعقل النسيان
اليوم اعليا امشات
خلاتني نعيش اللحظة لحظات
ناس الذوق و المعنى ݣفات
الدنيا بدلت وتبدلات
والصوالدا فرقو لخيات
وسط اهلي ونحس اغريب
نخمم فين نبات
الغربة إحساس
ماشي عيشة في ابلادات الناس.

بقلم الأستاذ رشيد ازطوطي