الأستاذ مولاي أحمد بلبهلول .
تنويه : تلبية لهذا الطلب الذي جاء على شكل تساؤلات ، و طلب أصدقاء آخرين و وفاء بالوعد سأخصص هذه الحلقة لموضوع برمجة شراء سيارات ( ج ) لبعض الجماعات الفقيرة …
الحلقة السابعة * :
سعادة ” الرايس” مساء الخير , أولا عيد مبارك و تقبل الله الصيام و القيام .
- الرايس : مسا الخير الله يبارك فيكم هو الصيام كاين و لكن القيام مانكذبو على الله ماكاين قيام كانسهرو شوية و لكن عا نلعبو الكارطة ، عا الله يسمح لينا و صافي .
سعادة الرايس اليوم عندنا معاك واحد الموضوع خاص و جديد و مخالف للحلقات السابقة .
- الرايس : ياك اودي لاباس ؟ الله يسمعنا خير .
بغينا نسولوك على قضية السيارات اللي برمجتو و صوتو عليهم الأعضاء محاضر الدورات شاهدة و التاريخ يسجل و لا يرحم أحدا .
- الرايس : أنا مامعاهمش و مانكذبش عليكم ، أنا و شي رؤساء خرين كنا بغينا نشريو تاحنا طوموبيلات و لكن قلنا تانشوفو هاذو الى قبلو ليهم و دازو تاحنا نتبعوهم ، ويلى رفضو ليهم ندخلو سوق روسنا .
و لكن أسعادة الرايس كاينين الدواور اللي ماعندهم مايشربو و ماعندهم تا لبهايم علاش يركبو ، كايمشيو على رجليهم شحال من كلم باش يجيبو الماء ، و ماعندهم سبيطار ما عندهم سيارة إسعاف , لعيالات الى بغاو يولدو كايوحلو ماعندهم فاش يجيو للسبيطار ، و التلاميذ ما عندهمش النقل المدرسي كاتلقاهم ديما فالطرقان كايشيرو ” اوطو سطوب” مرة يلقاو اللي يوصلهم و عدة مرات ميلقاوش و أغلب التلميذات ان لم نقل كلهن كاينقاطعو عن الدراسة كايخافو عليهم والديهم ، و المدارس ما عندها أسوار ما فيها مراحيض و بعيدة عليهم و زيد و زيد و زيد و نتوما كاتبرمجو فالطوموبيلات زعما واش ماكاتحشموش ؟
- الرايس : حنا دابا الرياس كانتحامرو .
كيفاش كاتحامرو ؟
- الرايس : بغيت نقول ليكم كانتعاندو مع بعضياتنا مللي كايشري شي رايس طوموبيل ب : 25 مليون ، الرايس لاخور كايشري ديال : 30 مليون كايجي رايس آخور كايشري ديال : 35 و نبقاو غادين طالعين نقدرو نوصلوها تا 50 مليون و كاينين رؤساء آخرين بحال رؤساء الجهات و المجالس الإقليمية كايوصلو تال : 70 مليون و كثر حيت عندهم لفلوس بزاف .
و لكن اسعادة ” الرايس ” لمعاندة ما خاصهاش تكون فالتبدير و المهراجانات و الزرادي ، خاصها تكون فالبرامج التنموية هاذ لفلوس راهم ماشي دياولكم باش تعاندو على شراء السيارات راهم فلوس دياول دافعي الضرائب و خاصكم تستثمروهم فتنمية الجماعة و فمصلحة المواطنين اللي صوتو عليكم ، مللي صوتو راهم ماصوتوش عليكم باش تشريو الطوموبيلات ، صوتو باش تخدمو مصلحة الجماعة ، كيفاش نتا كاتشوف سكان الجماعة ما عندهمش الما يشربوه و نتا راكب فسيارة ديال40 مليون و ثمنها يحفر 4 لبيار ، يقدرو ينقذو قبيلة بسكانها ببهايمها من العطش .
- الرايس : و انا مانركبش ؟ مللي يتجمعو الرياس فشي مناسبة ديال عرس و لا مهرجان و لا عزا و لا سبوع و يجيو كلهم راكبين فالطوموبيلات الغاليات و يبداو يسولو فبعضياتهم على الثمن باش شراوهم ، أنا نبقى ساكت ؟ تا أنا خاصني نشارك فالمناقشة تانا راني رايس و باغي نتفورما مع راسي .
شوف أسعادة ” الرايس ” الى بغيتي تفورما مع راسك شري سيارة من فلوسك من تجارتك الى عندك شي تجارة ، و لا من الورث الى خلا ليك باك شي ورث ، أما تفورما على سكان الجماعة بسيارة شاريها من فلوسهم و من عرق كتافهم و على حساب معاناتهم و فقرهم و تطبيبهم و تعليم أبناءهم و عطشهم ، فإن العاقبة لن تكون بخير .
إقرأ لنفس الكاتب : السلسلة الشيقة ” حوار مع سعادة الرايس ” ( جميع الحلقات ) .
* ملحوظة هذه الحوارات لا تعني رئيسا معينا و لا جماعة معينة بقدر ما تسلط الضوء على بعض الخروقات و الاختلالات في بعض الجماعات الفاسدة التي لا تحترم المساطر القانونية .
بقلم الأستاذ مولاي أحمد بلبهلول .
مقالات ذات صلة
-
-
-
-
-
-
