الأستاذ مولاي أحمد بلبهلول .
الحلقة الخامسة * :
سعادة الرايس وقفنا في الحلقة الماضية عند لجنة التفتيش : ما حصلتنا فالشنطيات وفلقوادس ديال الواد الحار و لبياس ديال الطومويلات و الكاميوات و بغات تحصلنا فلماكلة اشرح لينا كيفاش؟ نبداو معاك بالشانطيات أسعادة الرايس .
- الشانطيات أسيدي مللي كايبغي شي واحد يدير تجهيزة كايصاب لبلان .
بالتي أسعادة الرايس أشنهيا التجهيزة ؟
- هي كايشري الأرض و كايردها سيسان .
كيفاش سيسان ؟
- السيسان هما الديور .
آه باغي تقول تجزئة ؟
- هيا هديك .
كفاش كاتديرو ليها أ سعادة الرايس ؟
- ماشي حنا اللي كانديو مول التجزئة اللي كايدير حنا مكانديرو والو عاكانسنيو ليه .
و هو آش كايدير مللي تسنيو ليه ؟
- كايصايب بلان مللي نسنيو ليه كايعاود يبدلو الطريق اللي فيها 15 مترو كاتعود فيها 12 و اللي فيها 12 كاتعود فيها 10 و اللي فيها 10 كاتعود فيها 8 و هادوك الطرقان الصغار ديال 6 مترو . كايحيدهم و كيحد المدارس و المستوصفات و كايحد كلشي داك الشي اللي كاتسميوه المرافق العمومية و كايجيب لينا لبلان و كانسنيوه ليه .
و ياك سنيتو ليه فلأول علاش كاتسنيو ليه ثاني ؟
- حيت بدل لبلان .
و اللجنة المختصة كاسني معاكم ؟
- كاتسني معانا فلبلان الأول .
و التاني ؟
- لا ماكاتسنيش معانا كانسني أنا و المهندس.
و المراقبة ؟
- لا ماكاينة تا مراقبة حيت حنا اللي كانراقبو ، بالتي سمحو ليا نجاوب هاذ المصيبة ماعرفت تاهية منين تسلطت عليا ،
خذ راحتك أسعادة الرايس …
- ألو لالة التايكة لاباس ؟
التايكة : مالاباس والو أسعادة الرايس قول ليا أخويا نتوما كاتضربو الضربات لكبار ديال 300 و 400 مليون و حنا مللي نصوتو عليك كاتدير لينا لغدا و تعطينا 100 الف ريال واش هداك هو حقنا ؟ تاحنا راه بغينا نفرحو بوليداتنا و ندخلوهم للجامعات و بغيناهم يعودو لينا طبيبات و فرماسينات و بغينا ندوزو العطلة فالشمال …
- سمعي سمعي ياك داك نهار جيتي عندي قلتي ليا ولدك حاصل فشيك ديال 4 ملاين و اعطيتها ليك …
التايكة : إيه و لكن العضو فرتلان راك عطيتيه 8 لملاين ، وهنا راك كاتضرب مبدأ المناصفة ، واش هاذي هيا المناصفة اللي كاتدوي عليها الدولة ؟ عطينا بحال بحال عفاك كي الراجل كي لمرا وراك مادرتي إلا القانون قانون المناصفة …
- بالتي ألالة التايكة خليني تانا ندوي ….
التايكة : دوي أسعادة الرايس .
- شوفي لقراية ديال ولادك على حسابي فأي جامعة مشاو ليها و التخيام فالشمال تا هو على حسابي اختاري لمدينة اللي بغيتي الدار مفرشة مجهزة و الطوموبيل ديال الجماعة تديكم و تجيبكم …
التايكة : بارك الله فيك أسعادة الرايس و لكن ولدي لكبير ما كايبغيش يخيم معانا ما كايتفامش ليا مع ختو و هو كا يبغي أكادير .
- ماشي مشكيل تاهو غادي نعطيه باش يخيم و علميه من دابا قولي ليه التخيام ديالك على حساب سعادة “الرايس ” …
التايكة : أيوا دابا دويتي الله يخليك لينا و زيد فعمرك …
- سمحو ليا هاذ المصيبة راها عضوة معايا فلجماعة ها نتوما سمعتو كلشي على ودنيكم ..
الدنيا هانيا أسعادة الرايس نوقفو هنا تا للحلقة المقبلة و نكملو … شكرا مرة أخرى سعادة الرايس .
- لا شكر على واجب .
* ملحوظة هذه الحوارات لا تعني رئيسا معينا و لا جماعة معينة بقدر ما تسلط الضوء على بعض الخروقات و الاختلالات في بعض الجماعات الفاسدة التي لا تحترم المساطر القانونية .
بقلم الأستاذ مولاي أحمد بلبهلول .
مقالات ذات صلة
-
-
-
-
-
-
